«SSKÓB» AQ Qashar kenishine ınvestısıalyq baǵdarlama aıasynda jańa BelAZ 75/307 keldi. Júk kóterimdiligi 220 tonnalyq kólik – kásiporynnyń avtoparkindegi samosvaldardyń eń qýatty, ári ónimdi ókili.

Quny 1 mıllıard teńgeden asatyn tehnıka 50 gradýs sýyq pen aıazǵa qaramastan jumys isteı beredi. Negizgi mindeti – kenishtiń tómengi deńgeıjıegindegi ekskavator júktegen ken úıindisin joǵaryǵa aparyp tógý. Ortasha eseppen, bir aýysymda 27 reıs jasap, jylyna 4 mln tonna júk tasymaldaı alady.

BelAZ júrgizýshiniń qaýipsizdigi men jumys senimdiligin qamtamasyz etetin baqylaý júıelerimen jabdyqtalǵan. Mysaly, mashına júre bastaǵanda eskertý dybysy avtomatty túrde iske qosylady. Uıqyǵa qarsy júıe adamnyń qalǵyp ketpeýin qadaǵalasa, kabınada ornalasqan túıme tótenshe jaǵdaılarda qozǵaltqyshty jedel óshirýge múmkindik beredi.